Biografie
Ron Roemen is gebaoren en getaogen in Mofert. Óndanks dat hae oppe Deelgaard haet gewoond en noe al jaore in Sjawbrook laef, blief hae ummer van Mofert. Sjienbaar veultj dit ouch zoea veure miense die ‘m taenge kómme. Es d‘r mit zien korpse óngerwaeges is, örges op ’n terrasje zit, of es d‘r aan het fietsen of op vekansie is. Dök klink ’t dan: ‘Dao geit dae van Mofert!’ of ‘Is dat dae van Mofert?’
De naam van zien nuuj projek kós dan onneet misse: ‘Van Mofert’.
De leedjes van ‘Van Mofert’ zólle netuurlik ouch oet de pen van Ron kómme, net zoea wie de leedjes van La Bamba enne leedjes die Ron veur angere artieste sjrief. Dit lèste duit hae vanoet RRM (www.ronroemenmusic.nl).
Meziek is dudelik de roeaje draod in ‘t laeve van Ron. Suksesse zeen dore jaore haer neet oetgebleve. Zoea kintj geer dinke ane hoeagtepuntje mit zien korpse (Limburgse en Nederlanse kampeoensjappe, prieze veur ’t hoogs aantal puntje, gouje pauke op ’t WMC) én netuurlek ’t winne van ‘t LVK mit La Bamba mit “Laef, Limburg laef!”
Mit ‘Van Mofert’ wiltj Ron eine ganse angere kantj van zichzellef óntwikkele.
Samewèrkinge
Soloprojek
In principe is ’Van Mofert’ ein soloprojek van Ron. Mer geregeld zal Ron de samewèrking zeuke mit anger muzikanten oet Mofert. Dit ómdet ’t leedje dróm vruueg of ómdet Ron det gewuuen erg leuk vintj.
Aimee Baars
Aimee is, net wie Ron, ummer bezig mit meziek. Zinge tiedes ceremonies van broelofte, oetvaarte, in verzorgingstehoeze of eine woongroep. Ouch guuef Aimee zang-, piano- en gitaarlesse. Aimee speelde vreuger al es fluitiste bie Excelsior, ’t korps wo Ron instructeur van woor. De klik dae d’r doe al woor is ummer gebleve. Daobie is Ron van meining det Aimee zink wie ‘nne nachtegaal. Dus neet verrassend det Aimee noe de vaste gaszangeres van ‘Van Mofert’ is. ’t Ieëste reseltaat van dees samewèrking is ’t aanstaekelikke ‘Zomer’.
Jo Roemen (pap van Ron)
Jo speeltj al zien ganse laeve accordeon, zellefs noe op 82-jäörige laeftied nag. Van 1954 toet 1992 speelde hae in ’t femilie-orkes de Romona’s. Dore Romona’s waerde ’t door Sef Kempkens gesjreve ‘Mien ajers hoes’ waereldberoemp inne ómgaeving en wied d’rboete. Veur Ron dan ouch hieël biezónjer det hae dit leedje noe same mit ziene pap haet opgenómme. In ein anger (blaoskepelle-) jeske mer ’t blief ’t deerbare ‘Mien ajers hoes’.
Repertoire
Het repertoire, wo ich noe lekker drök mit bezig bön, zal gaon bestaon oet väölal klein, geveulige leedjes, doonbie ’t hert. Ouch zólle d’r leedjes zeen mit ein luchtiger kerakter of óm mit te lache. In eder geval zólle de leedjes oet ’t laeve gegrepe zeen. D’n eine kieër mit ‘nne lach en d’n angere kieër mit ‘n traon.
Alle offesjele releases van ‘Van Mofert’ zeen op Spotify (zellefs zónger abonnement) te vinje.
Alle leedjes (ouch de neet offesjeel oetgebrachde) van ‘Van Mofert’ zeen te beloestere op ’t eige YouTube-kenaal en ouch te vinjen op mien Facebookpagina.
oetzeuke, sjrieven en opnumme
Op dit moment bön ich drök bezig mit ’t oetzeuke, sjrieven en opnumme van leedjes.
Es ich ein mieër-dan-te-gek-repertoire biejein höb gesjraveld bön ich te boke veur ein keileuk optraeje. Ein optraeje mit ‘nne lach en ‘n traon.
Veuresnag kintj geer ‘Van Mofert’ allein op YouTube en Spotify beloestere.
lèste nuuts via sociale media
Volg al ‘t lèste nuuts van ‘Van Mofert’ via mien Facebookpagina: